တမန်တော် နူးဟ် (عليه السلام)

တမန်တော် နူးဟ် (عليه السلام)

🌊🌊🛳️🌊🌊🛳️🌊🌊🛳️🌊🌊

တမန်တော် နူးဟ် (عليه السلام) နေထိုင်ခဲ့သော နေရာဒေသသည် ယနေ့ အီရတ်နိုင်ငံတွင် ပါဝင်၏။ 'စူမေရီးယား' ရှိ ရုပ်တုကိုးကွယ်သော လူမျိုးစုတို့အား တမန်တော် နူးဟ် (عليه السلام) က မှန်ကန်သော ဒီန် သာသနာဘက်သို့ ဖိတ်ခေါ်မှုပြုခဲ့၏။ ကျမ်းတော်မြတ် ကုရ်အာန်၏ ဖော်ပြချက်အရ သိရသည်မှာ...

တမန်တော် နူးဟ် (عليه السلام) သည် နှစ်ပေါင်း (950) တိုင် သာသနာပို့ချမှုကိစ္စ ဆောင်ရွက်ခဲ့၏။ ထိုသို့ ကာလရှည် ကြိုးပမ်းခဲ့သော်လည်း လူအချို့သာလျှင် အီမာန်သက်ဝင် ယုံကြည်ခဲ့၏။ ထိုအခါ အလ္လာဟ် (سبحانه وتعالى) က ထိုတော်လှန် ပုန်ကန်သူများအား အပြစ်ဒဏ်ချမှတ်ရန် သတ်မှတ်တော်မူလေ၏။ ထို့ကြောင့် တမန်တော် နူးဟ် (عليه السلام) အား...

သင်္ဘောတစ်စီး တည်ဆောက်ကာ မိမိတို့နှင့်အတူ စုံတွဲတိရစ္ဆာန်တိုင်းကို ထိုသင်္ဘောပေါ်တွင် တစ်ပါးတည်း တင်ဆောင်ရန် အမိန့်ပေးတော်မူခဲ့၏။

အမှန်ကန်ဆုံးဟု ယူဆရသော အဆိုတစ်ရပ်အရ သိရသည်မှာ ထိုသင်္ဘောကို တမန်တော် နူးဟ် (عليه السلام) က အီရတ်နိုင်ငံရှိ ကူဖွာမြို့တွင် တည်ဆောက်ခဲ့ခြင်းဖြစ်၏။

ထိုသင်္ဘော တည်ဆောက်ပြီး နောက်ပိုင်းတွင် ကောင်းကင်ယံမှ အလွန်သည်းထန်စွာ မိုးများရွာသွန်းချ၏။ မြေပြင်ရှိ နေရာတိုင်းမှ ရေများစူထွက်လာ၏။ ကိုက်ရာပေါင်းများစွာအထိ ရေလှိုင်းများ မြင့်တက်လာ၏။ တမန်တော် နူးဟ် (عليه السلام) အား ငြင်းပယ်ခဲ့သူများအားလုံး သေကြေပျက်စီးသွား၏။ ရက်ပေါင်းများစွာ ကြာညောင်းသောအခါ တဖြည်းဖြည်း ရေဆင်းစပြုလာ၏။ အလ္လာဟ် (سبحانه وتعالى) ၏ အမိန့်တော်အရ တမန်တော် နူးဟ် (عليه السلام) ၏ သင်္ဘောသည် ဂျူဒီတောင်ပေါ်၌ ဆိုက်ကပ်ခဲ့၏။

ကျမ်းတော်မြတ် ကုရ်အာန် စူရာဟ် ဟူးဒ် (11) အာယသ် (44) တွင် အလ္လာဟ် မိန့်တော်မူထားသည်မှာ -

ထို့နောက် (အလ္လာဟ် سبحانه وتعالى ထံတော်မှ ဤသို့) အမိန့်တော် ထုတ်ပြန်တော်မူလိုက်လေသည်။ အို- ပထဝီမြေ၊ အသင်သည် မိမိရေများကို စုပ်ယူမျိုချလေလော့။ ၄င်းပြင် အို- မိုးကောင်းကင် အသင်သည် (မိုးရွာသွန်းခြင်းကို) ရပ်ဆိုင်းလေလော့။ ထိုရောအခါဝယ် ရေသည် လျော့ပါး၍ သွားခဲ့လေသည်။ ထို့ပြင် အရေးကိစ္စသည်လည်း ပြီးမြောက်သွားခဲ့ရလေသည်။ ၄င်းပြင် ထိုသင်္ဘောသည်လည်း 'ဂျူဒီ' တောင်ပေါ်၌ ရပ်နား၍ သွားခဲ့လေသည်။ ထိုမှတစ်ပါး (မိမိတို့ကိုယ်ကို မိမိတို့ပင်) နှိပ်စက်ကလူ ပြုမှုကုန်သော သူတို့သည် (ကရုဏာတော်မှ) ကင်းဝေးခဲ့ကြချေပြီးတကား... ဟု မိန့်ကြားတော်မူခြင်း ခံခဲ့ရလေသတည်း။ (ကုရ်အာန်11:44)

ဂျူဒီတောင်အမြင့်မှာ ပေပေါင်း (6800) ဖြစ်၏။ ယင်းဂျူဒီတောင်သည် တူရကီနိုင်ငံအရှေ့ပိုင်း အာမေးနီးယား နယ်စပ်အနီးရှိ 'အရာရသ်' ရေခဲတောင်မှ ကီလိုမီတာ (300) အကွာအဝေးတွင် တည်ရှိ၏။

📘 စာအုပ်အမည် ...

ကျမ်းမြတ်ကုရ်အာန်က သတိပေးနေသည့် သံဝေဂယူဖွယ်ဖြစ်ရပ်မှန်နှင့် သမိုင်းဝင်နေရာဒေသများ

✍ ဘာသာပြန်စာအုပ် ထုတ်ဝေသူ ...

မော်လဝီ ဂါဇီ ကရီးမ်ဘခ်ရှ် - ဦးစိုးလွင် (မဟ်မူဒီ)

🌴 Noor Mohammad 🌴

   🗓️ 27 / 06 /2019